0:00
/
1ܐܝܼܢܵܐ ܒܗ̇ܘ ܙܲܒ̣ܢܵܐ ܐܝܼܬ ܗ݇ܘܵܘ ܬܵܡܵܐ ܐ݇ܢܵܫܹ̈ܐ ܕܗܘܼܩܹܠܗܘܿܢ ܐܸܠܹܗ ܒܘܼܬ ܕܓܠܝܼܠܵܝܹ̈ܐ: ܐܵܢܝܼ ܕܦܝܼܠܵܛܘܿܣ ܚܒܸܛܠܹܗ ܕܸܡܵܝܗܝ ܥܲܡ ܕܸܒ̣ܚܵܝ̈ܗܝ. 2ܘܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܒܸܚܫܵܒ̣ܵܐ ܝܬܘܿܢ ܕܐܵܢܝܼ ܓܠܝܼܠܵܝܹ̈ܐ ܚܲܛܵܝܹ̈ܐ ܗ݇ܘܵܘ ܙܵܘܕܵܐ ܡ̣ܢ ܟܠܵܝܗܝ ܓܠܝܼܠܵܝܹ̈ܐ: ܕܗܲܕܟ̣ܵܐ ܐَܬܹܐܠܵܗ̇ ܒܪܹܫܵܝܗܝ. 3ܠܵܐ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܠܵܐ ܬܲܘܸܒܝܼܬܘܿܢ: ܐܘܼܦ ܟܠܵܘܟ̣ܘܿܢ ܗܲܕܟ̣ܵܐ ܒܸܬ ܬܵܠܩܝܼܬܘܿܢ. 4ܝܲܢ ܐܵܢܝܼ ܬܡܵܢܸܥܣܲܪ ܕܢܦܸܠܹܗ ܥܲܠܵܝܗܝ ܒܘܼܪܓ̰ܵܐ ܒܫܝܼܠܘܿܚܵܐ: ܘܩܛܝܼܠܵܝܠܹܗ: ܒܸܚܫܵܒ̣ܵܐ ܝܬܘܿܢ ܕܚܲܛܵܝܹ̈ܐ ܗ݇ܘܵܘ ܙܵܘܕܵܐ ܡ̣ܢ ܟܠܵܝܗܝ ܒܢܲܝ̈ܢܵܫܵܐ ܕܒܸܥܡܵܪܵܐ ܒܐܘܿܪܸܫܠܸܡ. 5ܠܵܐ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܠܵܐ ܬܲܘܸܒܝܼܬܘܿܢ: ܟܠܵܘܟ̣ܘܿܢ ܐܲܝܟܼ ܕܐܵܢܝܼ ܒܸܬ ܬܵܠܩܝܼܬܘܿܢ. 6ܘܐَܡܝܼܪܹܗ ܐܵܗܵܐ ܡܵܣܵܠܵܐ: ܚܲܕَ ܐܝܼܠܵܢܵܐ ܕܬܹܐܢܵܐ ܐܝܼܬ ܗ݇ܘܵܐ ܠܐ݇ܢܵܫܵܐ ܕܢܨܝܼܒ̣ܵܐ ܓܵܘ ܟܲܪܡܹܗ: ܘܐَܬܹܐܠܹܗ ܛܸܥܠܹܗ ܒܝܹܗ ܠܛܥܘܿܢܝܵܬܹ̈ܐ: ܘܠܵܐ ܡܘܼܫَܟ̰ܸܚܠܹܗ. 7ܘܐَܡܝܼܪܹܗ ܠܦܵܠܚܵܐ: ܗܵܐ: ܬܠܵܬَ ܫܸܢܹ̈ܐ ܒܹܐܬܵܝܵܐ ܝܘܸܢ ܒܸܛܲܥܝܵܐ ܠܛܥܘܿܢܬܵܐ ܒܐܵܗܵܐ ܐܝܼܠܵܢܵܐ ܕܬܹܐܢܵܐ: ܘܠܹܐ ܝܘܸܢ ܡܵܫَܟ̰ܘܼܚܹܐ: ܦܪܘܿܡ ܠܹܗ: ܩܵܡܘܿܕܝܼ ܒܵܛܘܿܠܹܐ ܝܠܹܗ ܠܐܲܪܥܵܐ. 8ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܹܗ: ܐܵܓ̣ܵܝܝܼ: ܫܒ̣ܘܿܩ ܠܹܗ ܐܘܼܦ ܐܵܗܵܐ ܫܹܢَܬܵܐ: ܗܲܠ ܕܚܵܦܪܸܢ ܚܵܕܸܪ̈ܘܵܢܹܗ ܘܙܲܒܠܸܢܸܢܹܗ. 9ܘܐܸܢ ܥܵܒܸܕ ܛܥܘܿܢܬܵܐ. (ܨܦܵܝܝܼ) ܘܐܸܢ ܠܵܐ: ܒܵܬَܪ ܗܵܕܵܐ ܦܵܪܡܸܬ ܠܹܗ. 10ܐܝܼܢܵܐ ܟܲܕ ܡܵܠܘܿܦܹܐ ܗ݇ܘܵܐ ܒܫܲܒܬܵܐ ܓܵܘ ܚܕܵܐ ܡ̣ܢ ܟܢܘܼܫܝܵܬܹ̈ܐ. 11ܗܵܐ: ܚܕܵܐ ܒܲܟ̣ܬܵܐ ܕܐܝܼܬ ܗ݇ܘܵܐ ܠܵܗ̇ ܪܘܼܚܵܐ ܕܡܲܪܥܵܐ ܬܡܵܢܸܥܣܲܪ ܫܸܢܹ̈ܐ: ܘܟܝܼܦܬܵܐ ܗ݇ܘܵܐ: ܘܗܸܟ̰ ܠܹܐ ܡܵܨܝܵܐ ܗ݇ܘܵܐ ܠܸܦܫܵܩܵܐ. 12ܘܟܲܕ ܚܸܙܝܵܠܹܗ ܝܼܫܘܿܥ: ܩܸܪܝܵܠܹܗ ܘܐَܡܝܼܪܹܗ ܐܸܠܵܗ̇: ܒܲܟ̣ܬܵܐ: ܫܪܝܼܬܵܐ ܝܘܲܬܝ ܡ̣ܢ ܡܲܪܥܵܟ̣ܝ. 13ܘܡܘܼܬܒ̣ܵܠܹܗ ܐܝܼܕܹܗ ܥܲܠܘܼܗ̇: ܘܕܲܪܣܵܥܲܬ ܦܫܸܩܠܵܗ̇: ܘܫܘܼܒܸܚܠܵܗ̇ ܠܐܲܠܵܗܵܐ. 14ܐܝܼܢܵܐ ܓ̰ܘܼܘܸܒܠܹܗ ܓܘܼܪܵܐ ܕܟܢܘܼܫܬܵܐ: ܟܲܕ ܒܸܟܪܵܒܵܐ: ܣܵܒܵܒ ܕܒܘܼܣܸܡܠܹܗ ܒܫܲܒܬܵܐ ܝܼܫܘܿܥ: ܘܐَܡܝܼܪܹܗ ܠܟܸܢܫܵܐ: ܐܸܫܬܵܐ ܝܵܘܡܵܢܹ̈ܐ ܝܢܵܐ ܕܒܝܼܝܼ ܘܵܓ̰ܸܒ ܝ݇ܠܵܗ̇ ܠܸܦܠܵܚܵܐ: ܒܲܣ ܒܝܼܵܝܗܝ ܗܵܘܹܝܬܘܿܢ ܒܹܐܬܵܝܵܐ ܠܸܦܝܵܫܵܐ ܒܘܼܣܡܹܐ: ܘܠܵܐ ܒܝܵܘܡܵܢܹ̈ܐ ܕܫܲܒܬܵܐ. 15ܐܝܼܢܵܐ ܓ̰ܘܼܘܸܒܠܹܗ ܡܵܪܲܢ ܘܐَܡܝܼܪܹܗ ܐܸܠܹܗ: ܝܵܐ ܢܵܣܒܝ̈ ܒܐܲܦܹ̈ܐ: ܟܠ ܚܲܕَ ܡܸܢܵܘܟ̣ܘܿܢ ܒܫܲܒܬܵܐ ܠܹܐ ܫܵܪܹܐ ܬܵܘܪܹܗ ܝܲܢ ܚܡܵܪܹܗ ܡ̣ܢ ܐܘܼܪܹܐ: ܘܠܵܒܸܠ ܡܲܫܬܹܐ. 16ܐܝܼܢܵܐ ܐܵܗܵܐ: ܕܒܪܵܬܹܗ ܕܐܲܒ̣ܪܵܗܵܡ ܝ݇ܠܵܗ̇: ܕܐܣܝܼܪܵܠܹܗ ܣܵܛܵܢܵܐ: ܗܵܐ: ܬܡܵܢܸܥܣܲܪ ܫܸܢܹ̈ܐ: ܠܹܐ ܗ݇ܘܵܐ ܘܲܓ̰ܸܒ ܕܦܵܝܫܵܐ ܫܪܝܼܬܵܐ ܡܐܵܗܵܐ ܝܸܣܘܼܪܵܐ ܒܝܵܘܡܵܢܹ̈ܐ ܕܫܲܒܬܵܐ. 17ܘܟܲܕ ܐܲܢܹܐ ܐَܡܝܼܪܹܗ: ܢܚܸܦܠܗܘܿܢ ܟܠܵܝܗܝ ܩܵܝܡܵܢܹ̈ܐ ܠܕܲܪܩܘܼܒ̣ܠܹܗ: ܘܟܠܹܗ ܛܵܝܸܦܵܐ ܚܵܕܹܐ ܗ݇ܘܵܐ ܒܟܠܵܝܗܝ ܥܵܓ̰ܸܒܘܼܝܵܬ̈ܵܐ ܕܗܵܘܝܼ ܗ݇ܘܵܘ ܒܐܝܼܕܹܗ. 18ܐَܡܝܼܪܹܗ ܗܲܕܟ̣ܵܐ: ܠܡܘܼܕܝܼ ܟܹܐ ܕܵܡܝܵܐ ܡܲܠܟܘܼܬܵܐ ܕܐܲܠܵܗܵܐ: ܘܠܡܘܼܕܝܼ ܡܲܕܡܸܢܵܗ̇. 19ܟܹܐ ܕܵܡܝܵܐ ܠܕܲܢܕܸܟܬܵܐ ܕܚܲܪܕܵܠ: ܗ̇ܝ ܕܫܩܝܼܠܵܠܹܗ ܐ݇ܢܵܫܵܐ ܕܸܪܝܵܠܹܗ ܓܵܘ ܓܲܢܬܹܗ: ܘܓܘܼܪܘܸܣܠܵܗ̇ ܘܗَܘܹܐ ܠܵܗ̇ ܐܝܼܠܵܢܵܐ: ܘܛܲܝܪܹ̈ܐ ܕܫܡܲܝܵܐ ܫܪܹܠܗܘܿܢ ܒܦܲܥܘܵܢܘܼ̈ܗ̇. 20ܘܡܸܢَܕܪܸܫَ ܐَܡܝܼܪܹܗ: ܠܡܘܼܕܝܼ ܡܲܕܡܸܢܵܗ̇ ܡܲܠܟܘܼܬܵܐ ܕܐܲܠܵܗܵܐ. 21ܟܹܐ ܕܵܡܝܵܐ ܠܚܡܝܼܪܵܐ: ܗ̇ܘ ܕܫܩܸܠܵܗ̇ ܒܲܟ̣ܬܵܐ ܛܘܼܡܸܪܵܗ̇ ܒܬܠܵܬَܐ ܟܝܼܘܼ̈ܠܹܐ ܕܩܲܡܚܵܐ: ܗܲܠ ܕܟܠܹܗ ܚܡܸܥܠܹܗ. 22ܘܚܵܕܸܪ ܗ݇ܘܵܐ ܓܵܘ ܡܵܬܘܵܬܹ̈ܐ ܘܡܕܝܼܢܵܬܹ̈ܐ: ܡܵܠܘܿܦܹܐ: ܘܒܹܐܙܵܠܵܐ ܠܵܐܘܿܪܸܫܠܸܡ. 23ܘܐَܡܝܼܪܹܗ ܐܸܠܹܗ ܚܲܕَ ܐ݇ܢܵܫܵܐ: ܡܵܪܲܢ: ܚܲܕَܟ̰ܵܐ ܝܢܵܐ ܐܵܢܝܼ ܕܚܲܝܝܼ: ܘܐَܡܝܼܪܹܗ ܐܸܠܵܝܗܝ. 24ܚܠܘܿܨܘܿܢ ܠܸܥܒܼܵܪܵܐ ܒܬܲܪܥܵܐ ܥܝܼܩܵܐ: ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܪܵܒܵܐ ܒܸܬ ܒܵܥܝܼ ܠܸܥܒܼܵܪܵܐ؛ ܘܠܹܐ ܡܵܨܝܼ. 25ܡ̣ܢ ܣܵܥܲܬ ܕܩܵܝܸܡ ܡܵܪܹܐ ܒܲܝܬܵܐ: ܘܕܵܒܸܪ ܬܲܪܥܵܐ: ܘܫܵܪܝܼܬܘܿܢ ܠܸܟܠܵܝܵܐ ܠܒܲܕܲܪ ܘܬܲܩܬܘܼܩܹܐ ܒܬܲܪܥܵܐ: ܘܠܹܐܡܵܪܵܐ: ܡܵܪܲܢ: ܦܬܘܿܚ ܐܸܠܲܢ: ܘܗ̇ܘ ܒܸܬ ܓ̰ܲܘܸܒ ܘܒܸܬ ܐܵܡܸܪ ܐܸܠܵܘܟ̣ܘܿܢ: ܠܹܐ ܝܵܕܥܸܢܘܟ̣ܘܿܢ ܡܐܲܝܟܵܐ ܝܬܘܿܢ. 26ܗ̇ܝܓܵܗ ܒܸܬ ܫܵܪܝܼܬܘܿܢ ܠܹܐܡܵܪܵܐ: ܩܵܕَܡܘܼܟ ܐܟܸܠܲܢ ܘܫܬܹܠܲܢ: ܘܒܥܵـ̈ـܠܘܿܠܵܢܲܢ ܡܘܼܠܸܦܠܘܼܟܼ. 27ܘܒܸܬ ܐܵܡܸܪ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܹܐ ܝܵܕܥܸܢܘܟ̣ܘܿܢ ܡܐܲܝܟܵܐ ܝܬܘܿܢ: ܪܚܘܿܩܘܿܢ ܟܠܵܘܟ̣ܘܿܢ ܡܸܢܝܼ: ܝܵܐ ܦܵܠܵܚܹ̈ܐ ܕܥܵܘܠܵܐ. 28ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ: ܟܲܕ ܚܵܙܹܝܬܘܿܢ ܠܐܲܒ̣ܪܵܗܵܡ ܘܠܐܝܼܣܚܵܩ ܘܠܝܲܥܩܘܿܒ̣: ܘܠܟܠܵܝܗܝ ܢܒ̣̈ܝܹܐ: ܓܵܘ ܡܲܠܟܘܼܬܵܐ ܕܐܲܠܵܗܵܐ: ܐܝܼܢܵܐ ܒܓܵܢܵܘܟ̣ܘܿܢ ܦܘܼܠܛܹܐ ܠܒܲܕܲܪ. 29ܘܒܸܬ ܐܵܬܝܼ ܡ̣ܢ ܡܲܕܢ̱ܚܵܐ ܘܡ̣ܢ ܡܲܥ̱ܪܒ̣ܵܐ: ܘܡ̣ܢ ܬܲܝܡܢܵܐ ܘܡ̣ܢ ܓܲܪܒܝܵܐ: ܘܒܸܬ ܝܵܬܒ̣ܝܼ ܓܵܘ ܡܲܠܟܘܼܬܵܐ ܕܐܲܠܵܗܵܐ. 30ܘܗܵܐ: ܐܝܼܬ ܐَܚܵܪ̈ܵܝܹܐ ܘܒܸܬ ܗܵܘܝܼ ܩܵܕَܡܵܝܹ̈ܐ: ܘܐܝܼܬ ܩܵܕَܡܵܝܹ̈ܐ ܕܒܸܬ ܗܵܘܝܼ ܐَܚܵܪ̈ܵܝܹܐ. 31ܒܗ̇ܝ ܣܵܥܲܬ ܐ݇ܬܹܐܠܗܘܿܢ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ: ܒܹܐܡܵܪܵܐ ܐܸܠܹܗ: ܦܠܘܿܛ: ܙܹܠَܐ ܠܘܼܟܼ ܡܐܲܟ̣ܵܐ: ܣܵܒܵܒ ܗܹܪܘܿܕܸܣ ܒܸܒܥܵܝܵܐ ܝܠܹܗ ܠܸܩܛܵܠܘܼܟܼ. 32ܘܐَܡܝܼܪܹܗ ܐܸܠܵܝܗܝ: ܙܹܠَܡܘܿܢ ܐَܡܘܿܪܘܼܢ ܠܐܵܗܵܐ ܬܲܥܠܵܐ: ܗܵܐ: ܦܵܠܘܿܛܹܐ ܝܘܸܢ ܕܲܝܘܹ̈ܐ: ܘܗܲܟܝܼܡܘܼܝܵܬܹ̈ܐ ܒܸܥܒ̣ܵܕܵܐ ܝܘܸܢ ܐܸܕܝܘܿܡَ ܘܩܵܝܕܲܡܬܵܐ: ܘܒܝܵܘܡܵܢܹ̈ܐ ܕܬܠܵܬܵܐ ܦܝܵܫܵܐ ܝܘܸܢ ܬܘܼܡܸܡܵܐ. 33 ܐܝܼܢܵܐ ܘܵܓ̰ܸܒ ܝ݇ܠܵܗ̇ ܐܸܠܝܼ: ܕܐܸܕܝܘܿܡَ ܘܩܵܝܕܲܡܬܵܐ ܘܒܝܵܘܡܵܢܹ̈ܐ ܐ݇ܚܹܪ݇ܢܵܐ ܐܵܙܸܠَܢ: ܣܵܒܵܒ ܠܹܐ ܡܵܨܝܵܐ ܕܢܒ̣ܝܼܵܐ ܬܵܠܸܩ ܠܒܲܕܲܪ ܡ̣ܢ ܐܘܿܪܸܫܠܸܡ. 34ܐܘܿܪܸܫܠܸܡ: ܐܘܿܪܸܫܠܸܡ: ܩܵܛܠܵܢܬܵܐ ܕܢܒ̣̈ܝܹܐ: ܘܪܵܓ̰ܡܵܢܬܵܐ ܕܐܵܢܝܼ ܕܝܼܢܵܐ ܫܘܼܕܸܪܹܗ ܠܟܸܣܠܵܗ̇! ܟܡܵܐ ܓܵܗܹ̈ܐ ܒܣܸܡܠܵܐ ܠܝܼ ܠܓ̰ܲܡܘܼܥܝܹܐ ܒܢܘܿܢܵܟ̣ܝ̈: ܐܲܝܟܼ ܕܟܬܵܝܬܵܐ ܓ̰ܲܡܥܵܐ ܙܲܥܝܘܼ̈ܗ̇ ܬܚܘܿܬ ܓܘܼܠܦܵܢܘܼ̈ܗ̇: ܘܠܵܐ ܒܣܸܡܠܵܐ ܠܵܘܟ̣ܘܿܢ. 35ܗܵܐ: ܦܝܵܫܵܐ ܝܠܹܗ ܫܒ̣ܝܼܩܵܐ ܐܸܠܵܘܟ̣ܘܿܢ ܒܲܝܬܵܘܟ̣ܘܿܢ ( ܚܵܪܵܒܵܐ): ܘܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܚܵܙܹܝܬܘܿܢ ܠܝܼ: ܗܲܠ ܕܐܵܡܪܝܼܬܘܿܢ: ܒܪܝܼܟ̣ܵܐ ܝܠܹܗ ܗ̇ܘ ܕܐܵܬܹܐ ܒܫܸܡܹܗ ܕܡܵܪܝܵܐ.